Abakora umwuga wo gutwara abantu kuri Moto  bazwi ku izina ry’ abamotari   bibumbiye muri koperative  COTAMONO kuri uyu wa kabiri bambitswe umwambaro  mushya   na Sosiyete y’  itumanaho  TIGO  usimbura  uwo bari  basanganywe  wa  Rwandatel.  Muri ibyo birori  byabereye kuri Stade Ubworoherane   mu karere ka Musanze , abamotari bahaherewe ubutumwa  ko mu kwezi kwa gatandatu  bateguriwe ingando izamara icyumweru bityo nabo bakinjira mu Itorero ry’Igihugu.

Kuri iyu wa kabiri tariki ya 17 gicuratsi 2011, Abamotari   bakiriye umwambaro mushya w’akazi   bita gilet.Imvaho Nshya yegereye  bamwe mu bahawe  uwo mwambaro  bayitangariza ko  bawishimiye  kandi bazajya bawugirira isuku nk’abamotari biyubashye. Uwari  uhagarariye  Umuyobozi wa UCOOMONO ( Union des Coopératives  des Motard du Nord) muri ibyo birori  , Bwana Surwumwe  Venuste, yashimiye Sosiyete ya TIGO   kuri icyo gikorwa  aboneraho gusobanura gahunda  ziteganyijwe kugira ngo umwuga w’ubumotari ukorwe ku buryo bunoze  harimo gahunda yo gukoresha  Smart Cover Head  irashyirwa mu bikorwa mu gihe cya vuba kugira ngo hirindwe indwara zaterwa no gusangira Casque, na gahunda y’ingando ku bamotari iteganyijwe gutangira  ku itariki 02 kamena 2011  , icyiciro cya mbere kikaba kizaba kizahuza abamotari 600 harimo 300 bo  mu mujyi wa Kigali abandi 300 bakazaturuka mu ntara. Yakomeje  asaba abanyamuryango  gutanga imisanzu  kugira ngo ibikorwa biteganywa na n’urugaga rw’abamotari mu gihugu   bibashe kugerwaho.

Twababwira ko Tigo itanga iyo myambaro mu rwego rwo gufatanya  na Leta  kubungabunga umutekano  mu muhanda  no kumenyekanisha  igihugu  kuko uwo mwambaro   ukoze kuburyo ugaragza  amabara y’ ibendera ry’igihugu cyacu cy’U Rwanda,  ukaba kandi wanditsweho  nomero z’umumotari n’agace akoreramo , kugira ngo  ukoze ikosa ahite amenyekana. Ni umwambaro watanzwe ku buntu nta kiguzi,bityo rero ntawemerewe  kuwugurisha  cyangwa ngo awutize .Ikindi   wambarwa igihe cyose  nyirawo ari mu kazi.